لاباس ياللي للمواجيب نطاح
عسى غثاها يالبناخي يزولي
لعل راسك يابيض الوجه يرتاح
ويسقيه من سحب العوافي ثعولي
الحمد للمعبود فلاج الاصباح
على سلامت من يقول ويطولي
ياللي لبست المرجله تاج ووشاح
اقولها واحمي كلامي وقولي
هذي هي الدنيا على خف وجناح
لو كان زانت عجلتن بالميولي
الصبر عند مصادف الوقت مفتاح
وترا البلا عن كل زله غسولي
دنياك مابين الخساره والارباح
ربحانها مسلم وغيره يزولي
يامكثر اللي من صواديفها طاح
عقب العوافي بالفراش معلولي
لامن صدرك من لواهيبها فاح
اخير مافيها صلاة الليولي
خلوة مع المعبود نزاع الارواح
في دعوة يمكن يجيها قبولي
بكره يزيل الهم والصدر يسناح
ونركب على اللي ماشراه الزعولي
مع خوة اللي بالمهمات ماراح
يثني ليا صارت تصول وتجولي
وقت الرخاء تلقاه ناقد ومزاح
ووقت الشدايد مايجيك بخمولي
خوة وفاء ماهي نفاق وتمصلاح
مع مخرم خالي نسج ونجولي
وناخذ لنا في عالي الرجم مسرراح
ولا ننزل الا في خيار الوعولي
قلته وانا في غبه البحر سباح
يابو سند هذا هواي وميولي
وعلى الحبيب اعداد مابارق لاح
صلو على وجه النبي الرسولي
الشاعر حسين سند
حي الجواب إلى لفاني بالالواح
مكتوب في مي الذهب ومعمولي
من شاعرن في غب الأمواج سباح
يرقا السنود ولايحب النزولي
ينشد عن احوالي وانا اقول مرتاح
ابشرك امشي على الأرض طولي
وهاذي هي الدنيا غرابيل وافراح
نوبن سماء يمطر ونوبن امحولي
كم حاكمن فيها رقا روس الامداح
واليوم في وسط السجون معزولي
وصدام ومعمر اطوال الارماح
صادتهم ايدين الإعادي نزولي
دنيا الفنا تلعب بالمخاليق لولاح
وهني من يمسك طريق الرسولي
لاظالمن نفسه ولامسه اجراح
ولطاعت الرحمن دايم عجولي
محبوب بين الناس وللخير مفتاح
مالوع الجيران تقل مهبولي
ميزان عدل وللحواسيد ذباح
صدقانه العقيل برأيه تجولي
ولياطالت الطرقه صبورن ومزاح
مثل عطاءالله جعل عمره يطولي
ابونجر عن مطلب الربع مازاح
نطاح للقالات بكل الحمولي
انت الرفيق إلى له البال يرتاح
ياعزوتي لدندنن الطبولي
هبت هبوب الخير ومن يمكم لاح
برق السحاب إلى يصب السيولي
سيل الصداقه والمعزه والامداح
ياكاسب النوماس برج الزحولي
هذا الصحيح إلى كما النور وضاح
وكل الرفاقه مثل قولي تقولي
وصلاة ربي عد مابارقن لاح
على النبي إلى بديه نجولي
تعليقات
إرسال تعليق