ياحسين انا مشغول بالي عليك انت
كانك ماتدري ويش سر انشغالي
لا شفتك محزن ومهموم حزنت
اللي ببالك والله انه ببالي
لكن من كثر الحزن ويش عينت
غير العذاب وغير سهر الليالي
لونك بحالك وحالي تمعنت
اللي جرالك ربع مماجرالي
انا لو اجاملك ماني كما كنت
لاتحسب اني يوم اجاملك سالي
على الذي في داخلي لوتبينت
والله لتبكي لي وتاسف لحالي
وقفت في وجه الضروف وتمكنت
من صد غاراتٍ تهد الجبالي
صحيح هزتني ولكن مالنت
أعانني ربي عزيز الجلالي
اليا ذكرت اشياً كثيرة تحنحنت
وميلت من فوق الشماغ العقالي
عن بعض الأشيا لاسهيت وتهاونت
علي اكيد بينقدون الرجالي
من كثرمافي داخل الصدر كفنت
على ماقالو صار صدري شمالي
كنه على اللي داخله طوب واسمنت
شيٍ قديمٍ باقي وشي تالي
امرٍ جرى وانا بأمر ربي امنت
وعليه في كل الأمور اتكالي
علي مناحي العضياني
ياعلي يومنك على الرجم باينت
وجريت صوتك في طويل العوالي
حزنك يحزنبي وفرحتك الي بنت
عزيز عندي وابن غالي وغالي
مرحوم عودن في جنابه تحصنت
والي غدالك يابومناحي غدالي
ولاتحسبن الوقت مالاع غير انت
قدامنا ناسن وطاها النكالي
هاذي هي الدنيا متنشدك ويش انت
ولاهمها دمعن من العين سالي
تقرن فرحها بالكدر لو تفطنت
سجن التقي الي طريقه عدالي
جنة هل المنكر على صفحة النت
تزخرفت لاهل المناكر تلالي
ولذاتها طفسه وحسراتها برنت
ماترحم الرضع تفاجئ الغوال
بس افطن لبيت اللحد ويش زينت
قدام لايبغتك ذئب المفالي
وانا تراي بغبة الذنب دندنت
وان مارحمنا الله ذنوبي ثقالي
ان ثقل ميزان العمل فزت وايقنت
وان خف رحت مع اللجوف الهيالي
الياغضب ربي مع الناس لوزنت
خسران لو كل البشر لي اهالي
وليارضى ربي مع الناس لو شنت
رضاه يكفيني عزيز الجلالي
الشاعر/حسين سند المضيبري الرشيدي
تعليقات
إرسال تعليق