"أنا سعودي في القصيم أتباها" قصيدة للشاعر حسين بن سند بن مدالله المظيبري الرشيدي "موقع فياضة الرسمي"
يارب هببها من الشام ذعذوع
لين الضماير ترتوي من هواها
وناخذ لنا رحله مع اصحاب وربوع
للديره الي كثر الله حلاها
شرق العلاء غرب الحفيره من الكوع
ذيك الفجوج الي لطيفن هواها
بالقيض هفهوفن وبالبرد لاموع
حمر الهضاب الي يذري ذراها
عسى سحاب الوسم ياخذ له اسبوع
ويرخي هماليله وتسكن هواها
وتبكي عليها السحب وتصبها دموع
حتى الخباري يروي الله ثراها
ويصير عشب افياضها كنه زوع
ويعطر الانسام نفحة شذاها
دارن محبتها على القلب مطبوع
مايقنع الظميان من حلو ماها
دارن مناظرها للانظار راضوع
علاج القلوب الي تعثر ادواها
تحلولي الاشعار من الشبر للبوع
بوصف الديار الي يتلالا سماها
لوطبها التاجر نسى كل مشروع
ولو طبها الضايق همومه نساها
اكهوف وطلوح وصحاصيح ودروع
مشايها مايشتكي من حفاها
تشبه اوروبا بالصحاصيح والنوع
ويشبه لخضرا التونسيه حجاها
في ذكر سياحن لهم بالسفر بوع
زاروا اوروبا ورتووا من هواها
والا ماشوقي يم الاقطار مدفوع
انا سعودي في القصيم اتباها
ارض الجزيره عندي انهار وزروع
هي قبلة الاسلام عطرن ثراها
اشعارها التوحيد بالجؤ مرفوع
اطهر بقاع الارض ربي حماها
حكامها ال سعود والأمر مطيوع
والشعب واحد والعقيده سماها
علم وحضاره وختراعات وفروع
جزيرة الاسلام ندحر اعداها
ونسمة هبوب الشام تشبع عن الجوع
وتروي كبودن يابسه من ضماها
تعليقات
إرسال تعليق