( الاولي )
يمكملين الجيب خوذوا نصيحه
اخذو نصيحة واحدن له تجاريب
وفوا حقوق الجيب زين الشريحه
مصممه يبغاه يرقا المعاتيب
خلوه ياخذ مع هواء البر صيحه
ويطلع الكربون عقب التقانيب
خلوه يرزم بالديار الفسيحه
دارن هواها طيب ومن افخر الطيب
دارن علاجن لنفوس الجريحه
لطبها المشتاق جاب الهناديب
اجبال وفياض ونفودن امريحه
مدهال صيد ومسكنن لاشهب الذيب
عن ماقعن فيه المشاعر ذبيحه
خوذولكم سجه تطيب المشاريب
ليا صارت الريضان خضراء مليحه
والعشب نواره غداله نبانيب
والفقع يجمع والحباري طريحه
مع رفقت اهل الدين واهل التعاجيب
في خايعن تفنك زماليق شيحه
هذا هواء نفسي وكل المطاليب
( الثانية )
كل البشر في هالحياه يتعبر
احدن نفع نفسه والاخر دمرها
ناسن تحب الفسق والبذخ والشر
تفرح ليانشرت فضايح صورها
وناسن تحب الخير وتدور البر
ترجي ثواب الله وربك سترها
النعم باهل الدين والموقف الحر
الي بفعل الخير كلن ذكرها
والادمي يذنب والاله يغفر
لياتاب عبده كل اموره سترها
والرزق بيدين الولي عالم السر
محيي الهشيم الباليه من شجرها
الي يسوق الرزق لصغير الذر
بامره تسير الريح لامن ومرها
ويالادمي رزقك على الله ميسر
الي جعل عينك تحرك بصرها
ودنياك لو تعسر تراها تيسر
بيدين رب (ن) كل حبه بذرها
محصي جميع الخلق بالبحر والبر
الي جعل في وسط بحره دررها
( الثالثة )
لاوحسوفي راح عمري بلاشي
لاجبت فود ولادرست الشريعه
اول شبابي راعين للمواشي
واليوم شايب حافظن للوديعه
بين المره والورع ادير النقاشي
ومن التجارب صرت عالم طبيعه
ويالله يمنشي المزون النواشي
تجعل جميع اعضاي لامرك امطيعه
وترزقني التقوى وطيب المعاشي
وتختم لي الخيره في مستطيعه
ورضاك عني غايتي ونتعاشي
وليارضيت القلب حصل ربيعه
( الرابعة )
ويلاه ياوقتن قظيته بلاعرف
وقتن اعده من كبار الخساير
الصيد واجد واليالي لها ظرف
صار الجهل مني مرات البصاير
عديت ضلعانن بها الدهم والشرف
شمخ الجبال الي سقتها النداير
فيها القحم فوق المراقيب يشرف
نخس العويد معذبات الضماير
بدونن محبتها تغرف الحشا غرف
راع الولع منها يذوق العزاير
فرصه وضاعت معرفت التصرف
الله يعوضني بحلو البشاير
ويا ضلع انا شاي والدف القدم دف
من عقب ماني في معاسرك طاير
شوفي قصر والحيل قام يتضاعف
لياشفت عسرات الدروب اتذاير
جاوبت انا الورقاء على عالي الرف
وصفقت بالكفين ضايق وحاير
ولاينفع الرجال كثر التحسف
ماقدر المولى على العبد صاير
( الخامسة )
يالله يامسقي النوامي بالامطار
يرازق ضعوف البشر والبهايم
تهدي علينا من الهماليل قطار
من رحمتك غيثن سيوله دهايم
وتنبت لنا في الارض زينات الازهار
وعقب الجدب تخضر غصونن حطايم
وتدر بالماء العذب حلوات الابار
وتروا العطاشا والطيور الحوايم
يظفي على ابانات ويمين ويسار
ويسقي الحجاز ونجد وكل الخرايم
وناخذ لنا سجه مع البر مشوار
فوق الجيوب مطيرات العسايم
بين الدفاء والبرد ذعذوع الاسحار
يسقي شرايين الفؤاد الصوايم
وعطر الفياض يفوح والرب ستار
بجؤن نهاره شمس وبالليل غايم
وتحلولي الجلسه على شبة النار
مع رفقت الاخيار واهل العزايم
ويطيب شرب الكيف بنن ومسمار
والزعفران يفوح والهيل نايم
فنجال ينعش من يذوقه على النار
وعقب التعب ترتاح كل القوايم
بارضن تروت من هماليل الامطار
والعشب فيها صاير له زمايم
وقدام نور الصبح يبدي بالاسفار
تسمع طيورن من طربها غرايم
هاذي طرات العمر والوقت غدار
لو سمنت الايام تقلب هلايم
ويالله تكفينا بالاعدا والاشرار
ويالله تكفينا الامور العضايم
تعليقات
إرسال تعليق